باتىس قازاقستان وبلىسىنىڭ بارلىق مەديسينالىق مەكەمەلەرى قاعازسىز قۇجات  اينالىمىنا كوشتى. باتىس قازاقستان وبلىستىق دەنساۋلىق ساقتاۋ باسقارماسىنىڭ باسپا ءسوز حاتشىسى ايناگۇل ساقپوسىنوۆانىڭ ايتۋىنشا،  بقو پەريناتالدى ورتالىق «جۇكتى كەلىنشەكتەردىڭ فورۋمى» اتتى ءموبيلدى قوسىمشا دايىنداعان. قازىرگى تاڭدا قوسىمشا تەستتىك رەجيمدە تەكسەرىستەن ءوتىپ جاتىر. بۇل قوسىمشا ارقىلى جۇكتى ايەلدەر گينەكولوگ دارىگەرلەردىڭ كەڭەسىن ۇيدەن شىقپاي-اق الا الاتىن بولادى. وعان قوسا قوسىمشادا كوپتەگەن پايدالى كەڭەستەر ەنگىزىلگەن. سونداي-اق ورال قالاسىنداعى  ەمحانالاردا «قازمەدينفورم» مەديسينالىق اقپاراتتىق جۇيەسى مەن «ەلەكتروندى كەزەك» جۇمىسى جاقسى جولعا قويىلعانى ءمالىم. وبلىس كولەمىندە k-vrachu.kz ءموبيلدى قوسىمشاسى جۇمىس جاساۋدا. ونى Play Market پەن AppStore-دان تەلەفونعا نەمەسە پلانشەتكە جۇكتەپ الۋعا بولادى. بۇل ءموبيلدى قوسىمشانىڭ كومەگىمەن پايدالانۋشىلار ۇيدەن دارىگەردىڭ قابىلداۋىنا جازىلىپ، قوڭىراۋ شالۋعا، جازىلعان رەسەپتىلەردى، زەرتحانالىق زەرتتەۋلەردىڭ ناتيجەلەرىن كورۋگە مۇمكىندىك الدى.

باتىس قازاقستان وبلىستىق كلينيكالىق اۋرۋحانادا دا  مەديسينالىق اقپاراتتىق جۇيەسى ەڭگىزىلىپ، تىركەۋدەن باستاپ ناۋقاستى شىعارۋعا دەيىن تۇتاستاي قاعازسىز پروسەسسكە كوشتى. بۇل اقپاراتتىق جۇيە بارلىق مەديسينالىق ۇيىمدارمەن ونلاين رەجيمىندە بايلانىس ورناتۋعا مۇمكىندىك بەرەدى. «قازمەدينفورم» مەديسينالىق قاتەلەردىڭ سانىن ازايتۋعا، مەديسينالىق كومەكتىڭ ۇزدىكسىزدىگىن قامتاماسىز ەتۋگە، مەديسينالىق قىزمەتتەردىڭ ساپاسىن جاقسارتۋعا  مۇمكىندىك بەرەدى.

قالالىق №1 ەمحانادا اۋرۋدى باسقارۋ باعدارلاماسى (پۋز-پروگرامما ۋپراۆلەنيا زابوليەۆانيەم) ىسكە قوسىلدى. سونىمەن قاتار قانت ديابەتىنە شالدىققان ناۋقاستاردىڭ كوز اۋرۋلارىن الدىن الۋ جانە باقىلاۋ ءۇشىن ارنايى Peek Retina قۇرىلعىسى ساتىپ الىندى. ول ارقىلى جالپى تاجىريبە دارىگەرى ناۋقاستى كوز دارىگەرىنە جىبەرمەي، قۇرىلعىنى تەلەفونعا ورناتىپ، كوزدى ءوزى فوتوعا ءتۇسىرىپ، اقپاراتتىق جۇيەگە ەنگىزەدى.